Təcili tibbi yardım sürücüsü ilə valideyn arasında gərginlik yaşandı | Qurumdan açıqlama

Təcili tibbi yardım avtomobilində tıxacda qalan azyaşlının valideynləri ilə sürücü arasında gərginlik yaranıb.

Belə ki, valideyn övladının qan itirdiyini əsas gətirərək sürücüdən səs siqnalını işə salmağı tələb etsə də, sürücü “TƏBİB sirenanı işə salmağa icazə vermir”, – deyə cavab verib. Nəticədə xəstəni tibb məntəqəsinə çatdırmalı olan təcili yardım maşını tıxacda qalıb.

TƏBİB-dən qurum haqqında ittihama belə münasibət bildirilib:

“Görüntülərdə əks olunan məqamlar araşdırıldıqdan sonra xüsusi işıq və səs siqnallarından istifadəyə zərurət olub-olmadığı müəyyən oluna bilər. Görüntülərdə xəstəyə, sürücüyə, avtomobil vasitəsinə dair məlumatların əks olunmaması dəqiqləşməni çətinləşdirir. Hazırda araşdırma aparılır”.

Qurum rəsmisinin sözlərinə görə, araşdırmanın nəticəsinə uyğun olaraq tədbir görüləcək və bu haqda ictimaiyyətə açıqlama veriləcək.