Təcili yardım gələnə kimi oğlum can verdi... | Nişanı olacaqdı, faciəvi şəkildə həlak oldu

Şəmkirdə bədbəxt hadisə nəticəsində 23 yaşlı gənc həyatını itirib.

Belə ki, rayonun Qədimqala kəndində yaşayan Anar Məşədiyev yaşadığı evin girişindəki darvazanın üstündəki yüksəklikdə suvaq işləri görərkən ehtiyatsızlıqdan yıxılaraq ağır xəsarətlər alıb.

Həyatını itirən gəncin atasının sözlərinə görə, təcili yardım hadisə yerinə gec gəlib:

“Soruşanda ki, niyə gec gəlirsən, cavab verdilər ki, yollar bərbaddır. Həkimə aparanda dedilər ki, beyin sümüyü qırılıb”.

“Bu uşağı əziyyətlə böyütmüşdük. Sabah onun üçün elçi gedəcəkdik”, – deyə A.Məşədiyevin əmisi söyləyib.

İttihamlara cavab olaraq TƏBİB-dən bildirilib ki, oktyabrın 24-ü saat 12:00-da Şəmkir Rayon Mərkəzi Xəstəxanasının Təcili Yardım Şöbəsinə kişi cinsli şəxsin xəsarət alması səbəbi ilə çağırış qeydə alınıb:

“12:03-də həkim briqadasının çıxışı olub və 12:11-də onlar hadisə yerinə çatıblar. Təcili tibbi yardım briqadası tərəfindən şəxsin ölüm faktı qeydə alınıb”. Hadisə ilə bağlı Şəmkir Rayon Prokurorluğu tərəfindən araşdırma aparılır.