"İki ay əvvəl işığı, qazı özüm çəkmişdim" | Tərtərdə ər və arvadın ölümü ilə bitən dəhşətli hadisə

Tərtərdə baş verən yanğın iki nəfərin ölümü ilə nəticələnib.

Hadisə şəhərin Nəriman Nərimanov küçəsində yerləşən fərdi yaşayış evində qeydə alınıb.

Alov Fövqəladə Hallar Nazirliyinin yanğından mühafizə bölmələrinin əməkdaşları tərəfindən söndürülüb.

Yanğından sonra evə baxış keçirilərkən Əsgər Səmədov və onun həyat yoldaşı Adilə Hüseynovanın yanmış meyitləri aşkarlanıb.

Mərhumların oğlu hadisə ilə bağlı bildirib ki, evdə pul olan yerlərə baxış keçirərkən 16 000 manatdan 15 700 manatın itdiyini görüb. O, evdə elektrik və qaz xətlərinin normaya uyğun çəkildiyini, buna görə də yanğının qəsdən törədilə biləcəyindən şübhələndiyini deyib.

Meyitlər hadisə yerindən götürülərək müayinə olunması üçün Məhkəmə-Tibbi Ekspertiza və Patoloji Anatomiya Birliyinin Tərtər rayon şöbəsinə aparılıb.

Faktla bağlı araşdırma aparılır.