"Partlayış həmin an oldu" | Abşeronda dəhşət | “Atam ağır dərəcədə yanıb, anam da...” - Baku TV

Abşeron rayonunun Fatmayı kəndində fərdi yaşayış evində güclü partlayış baş verib.

Partlayış nəticəsində evdə olan ər və arvad yanıq xəsarətləri alıblar.

İlkin məlumata görə, hadisəyə qaz sızması səbəb olub. Belə ki, gecə saatlarında ev sahibi çay hazırladıqdan sonra qazı tam bağlamayıb. Səhərə yaxın ocağı yenidən yandırmaq istəyərkən evdə partlayış baş verib.

Hadisə zamanı evdə olan ailənin övladı valideynlərinə kömək edərək təcili tibbi yardıma məlumat verib.

“Partlayış səsinə oyandım. Gördüm ki, anam yerdə uzanıb, atam da evin içində yanır. Hər ikisinə kömək etdim və təcili tibbi yardıma zəng vurdum”, – deyə xəsarət alan şəxslərin oğlu bildirib.

TƏBİB-dən verilən məlumata görə, 1950-ci il təvəllüdlü Ağamməd Məmmədovun vəziyyəti ağırdır. O, hazırda Reanimasiya şöbəsində müalicə alır. Həyat yoldaşına ilkin tibbi yardım göstərildikdən sonra ambulator müalicə üçün evə buraxılıb.