Tərtərdə kişi keçmiş həyat yoldaşına dəhşət yaşatdı

Tərtərdə kişi keçmiş həyat yoldaşını döyüb.

Hadisə şəhər ərazisindəki fərdi yaşayış evində baş verib.

Həmin ünvanda yaşayan və ad soyadı şərti olaraq Elxan Alıyev olan şəxs 2017-ci ildə həyat yoldaşı Fərqanədən ayrılsa da, məhkəmə onların bir evdə yaşaması barədə qərar çıxarıb. Cütlük rəsmi boşanmasına baxmayaraq, birgə nikahdan olan iki övladını birgə böyüdüb.

Bir müddət əvvəl Fərqanə iki övladı və keçmiş qayınanası ilə birlikdə toy məclisinə gedib. Məclisdən qayıdarkən o, evdə keçmiş həyat yoldaşını sərxoş vəziyyətdə görüb. Fərqanə boşandığı üçün ona reaksiya verməyib və bu da Elxanı əsəbiləşdirib. O, Fərqanə ilə mübahisə edib. Nəticədə Elxan Fərqanəni döyməyə başlayıb. Qadın onun əlindən çıxaraq, evin hamam otağına keçib. Elxan onun arxasınca hamama gedərək, onu döyməyə davam edib. O, hamamda dəmir vedrəni götürüb və Fərqanənin baş və boyun nahiyəsinə çoxsaylı zərbələr endirib. Nəticədə qadın ağır kəllə-beyin zərbələri alıb.

Hadisə yerinə polis əməkdaşları gəlib və Elxan saxlanılıb, faktla bağlı cinayət işi başlanaraq iş məhkəməyə göndərilib.

Tərtər Rayon Məhkəməsinin hökmü ilə Elxan Alıyevə 6 ay azadlığın məhdudlaşdırılması cəzası verilib və ona elektron qolbaq tətbiq edilib.