Toyuq dönəri yeyib zəhərləndilər | 27 nəfər xəstəxanalıq oldu

Zaqatalada dönərdən kütləvi zəhərlənmə olub. Zəhərlənənlərin sayının 25-dən çox olduğu bildirilir.

İlk olaraq xəstəxanaya zəhərlənmə əlamətləri ilə Mosul kənd sakini Aynur Məmmədova və onun 2 övladı – 15 yaşlı Ravil Məmmədov və 12 yaşlı Ruslan Məmmədov müraciət ediblər. Müayinə zamanı ana və 2 övladının dönər yedikdən sonra vəziyyətlərində narahatlıq yarandığı məlum olub.

Daha sonra isə eyni əlamətlərlə rayonun Muxax, Aşağı Tala kəndləri və başqa ərazilərdən bir neçə nəfər xəstəxanaya daxil olub. Hazırda zərərçəkənlərə tibbi yardımın göstərilməsi davam edir. İlkin ehtimala görə, zəhərlənmə toyuq ətindən hazırlanan dönərdən baş verib.

Dönərxana sahiblərindən biri Rəsul Fətəliyev deyib ki, toyuq ətini həmişə aldığı yerdən götürüb:

“Bu gün 200 nəfərə dönər satılıb, əmin olmaq üçün öz kollektivimiz də, mən də yemişəm. Toyuq dönəridir, toyuğun problemidir. Hər gün götürdüyümüz şirkətindir, sertifikatı da var. Ümid edirəm başqa problem olmaz”.

Məsələ ilə bağlı Qida Təhlükəsizliyi Agentliyindən bildirilib ki, baş verən hadisənin səbəbləri, həmçinin qida zəhərlənməsi olub-olmaması ilə bağlı müvafiq qurumların əməkdaşları tərəfindən araşdırmalara başlanılıb. Araşdırmaların nəticələri ilə bağlı məlumat veriləcək.