Xaçmazdakı bu sex fəaliyyətini dayandırdı | Obyektin bağlanmasının əsas səbəbi

Dövlət Yanğın Nəzarəti Xidməti tərəfindən Xaçmaz şəhəri, Bakı prospektində yerləşən Almasov Kamil Mehdi oğluna məxsus “KamAZ” avtomobil təmiri sexində keçirilən yoxlama zamanı yanğın təhlükəsizliyi sahəsində çoxsaylı nöqsanların mövcud olduğu müəyyən edilib.

Həmin nöqsanların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı aşkar olunub.

Belə ki, obyektdə avtomatik yanğın xəbərverici siqnalizasiya qurğusu quraşdırılmadığı, standarta uyğun olmayan elektrik və qaz cihazlarından istifadə olunduğu məlum olub. Həmçinin elektrik təsərrüfatı “Elektrik Qurğularının Quraşdırılması Qaydası”nın tələblərinə uyğun quraşdırılmayıb.

Obyekt ilkin yanğınsöndürmə vasitələri ilə təmin edilməyib. Taxta konstruksiyalara odadavamlı məhlul hopdurulmayıb. Eyni zamanda daşınmaz əmlak sığorta olunmayıb.

Qeyd olunanlar nəzərə alınaraq “KamAZ” avtomobil təmiri sexinin fəaliyyətinin dayandırılması barədə qərar qəbul olunub və qərarın bir nüsxəsi obyektin nümayəndəsinə təqdim edilib.