Xocalıda araşdırma başlanıldı | Baş Prokurorluq məlumat yaydı

Xocalıda insana məxsus sümük fraqmentləri aşkar edilib.

Baş Prokurorluğun Mətbuat xidmətindən verilən məlumata görə, mayın 8-də Xocalının Malıbəyli kəndi ərazisində həyata keçirilən tikinti-qazma işləri zamanı insana məxsus olması ehtimal edilən müxtəlif sümük fraqmentləri aşkar edilib.

Fakt üzrə rayon prokurorluğunda araşdırma aparılır.

Bundan öncə isə Qubadlının Xanlıq kəndi ərazisində minatəmizləmə işləri aparılan zaman insana məxsus olması ehtimal edilən bir ədəd kəllə sümüyü aşkar edilib.

Eyni zamanda Ağdərənin Suqovuşan qəsəbəsində də yeni binaların tikintisi ilə bağlı qazma işləri aparılan zaman insana məxsus olması ehtimal edilən sümük fraqmentləri aşkarlanıb.

Qeyd edək ki, aprelin 30-da Əsir və itkin düşmüş vətəndaşlarla əlaqədar Dövlət Komissiyasının təşkil etdiyi mətbuat konfransında işğaldan azad edilmiş ərazilərdə indiyədək 18 kütləvi məzarlıq aşkarlandığı açıqlanıb. Həmin kütləvi məzarlıqlardan ən azı 172 nəfərə məxsus meyit qalıqları tapılıb. Onlardan 55 nəfərinin şəxsiyyəti eyniləşdirilib.