Yeməyinə siçan zəhəri qatmaq istədi, amma... | Qətl necə törədildi?

Ərinin qətlini sifariş verməkdə təqsirləndirilən Əzizə Seyidova və sifarişi icra etməkdə təqsirləndirilənlər – Mehdi Məmmədli, Elvin Əliyev və Bəxtiyar Fərzəliyevin cinayət işinin məhkəmə istintaqı yenidən aparılacaq.

Buna səbəb isə iki il əvvəl sözügedən cinayət işinin Bakı Ağır Cinayətlər Məhkəməsinin mərhum hakimi Səyavuş Hacıyevin icraatında araşdırılması olub.

2024-cü ildə hakim dünyasını dəyişdiyindən işin məhkəmə araşdırması tamamlanmamış hesab olunaraq yeni hakimin – Roman Ələkbərlinin icraatına verilib. Yeni icraatda keçirilən ilk baxış iclasında prokuror təqsirləndirilənlərə ittiham aktını elan edib.

Qeyd edək ki, hadisə 2023-cü il martın 15-də Sabunçu rayonunun Maştağa qəsəbəsində baş verib. İttihama görə, 23 yaşlı Əzizə Seyidova həyat yoldaşı Əli Seyidlinin ona xəyanət etdiyini əsas gətirərək yeməyinə siçan əleyhinə dərman qatıb zəhərləməyə cəhd edib. Sonradan isə fikrindən daşınıb, onu öldürtmək qərarına gəlib.

İttihamda qeyd olunur ki, Əzizə Seyidova ərinin qətlini tanışı Mehdi Məmmədliyə sifariş verib. Onlar birlikdə plan quraraq Əli Seyidlinin evə gəlib-getmə vaxtlarını dəqiqləşdiriblər. 2023-cü il martın 15-də Əzizə Seyidova Mehdi Məmmədli ilə əlaqə saxlayaraq planı icra etməyi tapşırıb.

Bundan sonra Mehdi Məmmədli dostları ilə birlikdə gecə saatlarında Əli Seyidlinin qarşısını kəsərək ona 23 bıçaq zərbəsi endirməklə qətlə yetiriblər.

Təqsirləndirilənlərə qarşı Cinayət Məcəlləsinin bir neçə ağır maddəsi ilə cinayət işi açılaraq barələrində həbs qətimkan tədbiri seçilib.