Zaqatalada ailə faciəsi | Doğum evində bir həftədə iki ölüm

Zaqatala Rayon Mərkəzi Xəstəxanasının Doğum şöbəsində yeni doğulan körpə ölüb.

Rayonun Yuxarı Tala kənd sakini, 41 yaşlı Pərvana İsgəndərova noyabrın 4-də qeysəriyyə yolu ilə uşaq dünyaya gətirib. Noyabrın 7-də cinsi oğlan olan körpə xəstəxanada dünyasını dəyişib.

Sözügedən xəstəxananın Doğum şöbəsinin ginekoloqu Nərgiz Nəzirova bildirib ki, doğuş fəsadsız keçib, 2-3 saat sonra isə körpənin vəziyyəti pisləşib:

“Müayinələr olunub, yeni doğulmuşda yaşama qabiliyyətinə uyğun olmayan müştərək ürək qüsuru aşkar edilib. Körpənin vəziyyəti təxliyə üçün uyğun olmadığından müalicəsinin Zaqatala RMX-da davam etdirilməsinə qərar verilib.

Gəncə Perinatal Mərkəzdən süni tənəffüs aparatı gətirilib, Șəki Perinatal Mərkəzin neonotoloqu tərəfindən körpə süni tənəffüs aparatına qoșulub və ağciyərin süni ventilyasiyası təmin edilib. Bütün göstərilən müdaxilələrə baxmayaraq, yeni doğulmușda ölüm faktı qeydə alınıb”.

Xatırladaq ki, bu, bir həftə ərzində rayonda ikinci yeni doğulan körpə ölümüdür. Noyabrın 1-də sözügedən xəstəxanada Yengiyan kənd sakini, 24 yaşlı Sahibə Məmmədovanın dünyaya gətirdiyi uşaq ölü doğulub.

Hər iki faktla bağlı Zaqatala rayon prokurorluğunda araşdırma aparılır.