2023-cü ildə uğur qazanan güləşçilərlə görüş keçirilib

2023-cü ildə keçirilən dünya və Avropa çempionatlarında, eləcə də hərbçilərin 36-cı dünya çempionatında yüksək nəticələr əldə edən güləşçilərimizlə görüş təşkil olunub.

Tədbirdə Azərbaycan Güləş Federasiyasının prezidenti Mikayıl Cabbarov, Dövlət Sərhəd Xidmətinin rəisi, general-polkovnik Elçin Quliyev, gənclər və idman nazirinin müavini Mariana Vasileva iştirak ediblər.

Qeyd olunub ki, Azərbaycan Güləş Federasiyası 2023-cü ildə dünya və Avropa çempionatlarında ən çox medal qazanan idman federasiyası olub. Belə ki, yunan-Roma güləşi üzrə millimizin tarixdə ilk dəfə dünya çempionu olması ilə yanaşı, 2023-cü ildə Avropa çempionatlarında 22-si qızıl, 20-si gümüş, 30-u bürünc olmaqla 72 medal, dünya çempionatlarında isə 5-i qızıl, 11-i gümüş və 13-ü bürünc olmaqla 29 medal qazanan pəhləvanlarımız qitə və dünya çempionatlarında 101 dəfə fəxri kürsüyə qalxıblar. Ümumilikdə isə güləşçilərimiz 2023-cü ildə beynəlxalq yarışlarda 76-sı qızıl, 75-i gümüş və 116-sı bürünc olmaqla 267 medal qazanıblar.

Görüşün davamında idmançılarımızın Bakıda keçirilən hərbçilərin 36-cı dünya çempionatında 11 qızıl, 3 gümüş və 7 bürünc medal əldə etməsi, sərbəst güləş üzrə millimizin komanda hesabında 1-ci, yunan-Roma və qadın güləşi üzrə yığmalarımızın isə 2-ci yeri tutduğu diqqətə çatdırılıb.

Daha sonra hərbçilərin 36-cı dünya çempionatında iştirak edən güləşçilər, məşqçilər, hakimlər və digər şəxslər təltif ediliblər.