60 yaşlı idmançı atıcılıq üzrə dünya çempionatında rekord qırdı

28 avqust 2023 364 baxış

Bakıda keçirilən atıcılıq üzrə 53-cü dünya çempionatında daha bir dünya rekordu qeydə alınıb.

Kişilər arasında 300 metr məsafəyə uzanaraq atəş açmada sloveniyalı Raymond Debeveç 1-ci yeri tutub. Mümkün 600 xalın hamısını toplayan Raymond bu növdə rekord qıran ən yaşlı atıcı adına yiyələnib.

Eyni növ üzrə komanda mübarizəsində qızıl medalı Norveç təmsilçiləri qazanıblar. Polşa və İsveçrə kollektivləri isə müvafiq olaraq 2-ci və 3-cü yerlərdə qərarlaşıblar.

Qadınlar arasında 300 metr məsafəyə uzanaraq atəş yarışında polşalı Karolina Romançik qalib gəlib. 593 xal toplayan Karolina gümüş mükafatın sahibi isveçrəli Silviya Qinyarı 1 xal qabaqlayıb. Bu növdə komanda yarışında isə İsveçrə idmançıları 1-ci olublar. Norveç atıcıları gümüş, Almaniya kollektivi isə bürünc mükafata yiyələnib.

Qeyd edək ki, sentyabrın 1-dək davam edəcək atıcılıq üzrə dünya çempionatında 101 ölkədən 1239 idmançı mübarizə aparır.

#Atıcılıq üzrə dünya çempionatı