Atıcılıq üzrə dünya çempionatında 50 metr məsafəyə atəşdə qaliblər məlumdur

Bakıda keçirilən atıcılıq üzrə dünya çempionatı davam edir.

Atıcılıq mərkəzində təşkil olunan yarışda bu dəfə həm kişilər, həm qadınlar arasında 50 metr məsafəyə tapançadan atəşdə qaliblər müəyyənləşib.

Kişilərin mübarizəsində qızıl medalı çinli Yu Xie qazanıb. Latviyalı Lauris Strautmanis və hindistanlı Ravinder Sinq isə müvafiq olaraq gümüş və bürünc mükafata yiyələniblər.

Bu növün komanda yarışında da Çin təmsilçiləri 1-ci olublar. Cənubi Koreya kollektivi 2-ci, Hindistan idmançıları isə 3-cü yeri tutublar.

Eyni növdə qadınlar arasında yarışda avstriyalı Silviya Şteyner qalib gəlib. Monqolustanlı Bayartsetseq Tumurşudur gümüş, hindistanlı Tiyana Tiyana isə bürünc medalın sahibi olub.

Qadınların komanda mübarizəsində də bu ölkələrin təmsilçiləri fəxri kürsüyə qalxıblar. Bu dəfə Hindistan atıcıları qızıl medalı ölkələrinin aktivinə yazıblar. Çin və Monqolustan isə sonrakı yerlərdə qərarlaşıblar.