Ağalı kəndində cüdo bölməsi fəaliyyətə başladı

Zəngilan rayonunun Ağalı kənd orta məktəbinin nəzdində cüdo bölməsi fəaliyyətə başlayıb.

Bununla əlaqədar təşkil olunan tədbirdə gənclər və idman naziri Fərid Qayıbov, Şərqi Zəngəzur iqtisadi rayonuna daxil olan Cəbrayıl, Qubadlı və Zəngilan rayonlarında Prezidentin xüsusi nümayəndəsi Vahid Hacıyev, Azərbaycan Cüdo Federasiyası prezidentinin müşaviri Natiq Bağırov və baş katib Rəşad Rəsullu qatılıblar. Onlar burada yaradılan şəraitlə tanış olaraq, gənc idmançılarla söhbət ediblər.

Qeyd edək ki, Ağalı kənd orta məktəbinin məşq zalı Beynəlxalq Cüdo Federasiyasının rəsmi təchizatçısının tatamiləri ilə təchiz olunub. Bundan başqa, gənc idmançılar cüdoqilərlə də təmin edilib. Əlavə edək ki, Zəngilan rayonunun Ağalı kənd orta məktəbindəki cüdo bölməsi Gənclər və İdman Nazirliyinin təşəbbüsü və Azərbaycan Cüdo Federasiyasının dəstəyi ilə fəaliyyətə başlayıb.