Ağırlıqqaldıranımız dünya birinciliyində 3 medal qazandı

Albaniyada keçirilən yeniyetmələr arasında dünya birinciliyində ağırlıqqaldıranımız Ravin Alməmmədov uğurlu nəticə ilə yadda qalıb.

73 kq çəkidə çıxış edən Ravin turniri 3 mükafatla başa vurub. Qazaxın "Göyəzən" ağır atletika klubunu təmsil edən R.Alməmmədov birdən qaldırmada 136 kq-ın öhdəsindən gələrək gümüş medala yiyələnib. Təkanla qaldırmada da qüvvəsini sınayan idmançımız 167 kq-ı ram edərək daha bir gümüş mükafatı aktivinə yazıb.

Ümumən 2 hərəkətin cəmində 303 kq nəticə göstərən Ravin yekun sıralamada 2-ci pillənin sahibi olub.