Ağırlıqqaldıranımız Ravin Alməmmədovdan qitə birinciliyində uğurlu çıxış

Azərbaycanlı ağırlıqqaldıran Ravin Alməmmədov Avropa birinciliyində 3 medal qazanıb.

İdmançımız gənclər və 23 yaşadək atletlər arasında təşkil olunan turnirdə 1 qızıl və 2 gümüş mükafatın sahibi olub.

Ravin Polşada keçirilən yarışda 81 kq çəki dərəcəsində mübarizə aparıb. Təmsilçimiz birdən qaldırma hərəkətində 151 kiloqramın öhdəsindən gəlib. Bu nəticə ilə R.Alməmmədov bütün rəqiblərini qabaqlayaraq fəxri kürsünün ən yüksək pilləsinə qalxıb.

Təkanla qaldırmada isə idmançımız 187 kiloqramı başı üzərinə qaldırıb. Bu göstərici ilə o, 2-ci yeri tutub. Ümumilikdə 2 hərəkətin cəmində 338 kq nəticəyə imza atan Ravin yekun sıralamada 2-ci olaraq daha bir gümüş medalı aktivinə yazıb.

Qeyd edək ki, Raşin şəhərində təşkil olunan Avropa birinciliyində 74 ölkənin idmançıları yarışır. Oktyabrın 24-ü başlayan turnir noyabrın 4-dək davam edəcək.