Amputant futbolçularımızdan bir ilk | Avropa çempionatının finalında iştirak edəcəklər

Azərbaycanın futbol üzrə amputant millisi Türkiyənin “ODTÜ Amputant” futbol klubu ilə təlim-məşq toplantısını davam etdirir.

Növbəti yoldaşlıq görüşü Xaçmazın Qoçaqlı kənd stadionunda keçirilib. Rayon İcra Hakimiyyətinin başçısı Elnur Rzayev matçdan əvvəl hər iki komandanın üzvləri ilə görüşüb, onlara qarşıdakı Avropa çempionatında uğurlar arzulayıb.

Görüş sakinlər tərəfindən maraqla izlənilib. Gərgin və maraqlı idman mübarizəsi şəraitində keçən oyun 2-2 hesabı ilə başa çatıb.

Qeyd edək ki, komandamız iyunun 1-dən 8-dək Fransanın Evian şəhərində təşkil olunacaq Avropa çempionatının final mərhələsinə vəsiqə qazanıb. İşğaldan azad edilən ərazilərimizdə düşmən tərəfindən basdırılan minaların partlaması nəticəsində xəsarət alan şəxslərdən ibarət komandamız Avropa çempionatının final mərhələsində ilk dəfə iştirak edəcək. 16 komandanın mübarizə apardığı final mərhələsində dünya çempionu Türkiyə ilə yanaşı, İngiltərə, Fransa, İspaniya, İtaliya, Almaniya və Polşa kimi güclü millilər iştirak edəcək.