“Arsenal” çempionluq yolunda vacib qələbə qazanıb

İngiltərə çempionatının lideri “Arsenal” 7-ci turdan təxirə salınan qarşılaşmada “Everton”u qəbul edib.

“Emireyts”dəki matçın ilk hissəsi Saka və Martinellinin qolları sayəsində topçuların 2-0 hesablı üstünlüyü ilə yekunlaşıb. 2-ci yarıda da hücumlarını davam etdirən London təmsilçisi daha 2 dəfə rəqibin qapısına yol tapıb. 71-ci dəqiqədə Ödeqor, 9 dəqiqə sonra isə Martinelli mersisaydlıları məyus edib. 4-0 hesablı qələbə qazanan “Arsenal” xallarının sayını 60-a çatdırıb və ilk pillədəki mövqeyini qoruyur. Son 4 oyunda 3-cü dəfə uduzan “Everton” isə 21 xalla 18-cidir.

“Liverpul” 7-ci turdan təxirə salınan matçda “Vulverhempton”u 2-0 hesabı ilə məğlub edib. İlk hissəsi qolsuz başa çatan görüşdə mersisaydlılar fasilədən sonra 2 qol vurublar. 73-cü dəqiqədə van Deyk, bir qədər sonra isə Salah “qırmızılar”ı sevindirib. Bu nəticədən sonra 39 xalı olan “Liverpul” 6-cı, 24 xalı olan “Vulverhempton” isə 15-ci yerdədir.

Liqa kubokunda qalib gələn “Mançester Yunayted” ölkə kuboku uğrunda da mübarizəni davam etdirir. 1/8 finalda “Vest Hem”i qəbul edən “qırmızı şeytanlar” 54-cü dəqiqədə hesabda geriyə düşsələr də, dönüş edə biliblər. Əvvəlcə Aqerdin avtoqolundan sonra tarazlıq bərpa olunub: 1-1. Əsas vaxta artırılan dəqiqələrdə isə Qarnaço və Fred fərqlənib. Beləliklə, 3-1 hesablı qələbə qazanan mankunianlar 1/4 finalda “Fulhem”ə rəqib olub.