Artur Beterbiyev – Dmitriy Bivol arasında döyüşdə favorit kimdir?

Bu gün – 12 oktyabrda Səudiyyə Ərəbistanının paytaxtı Ər-Riyadda yarım ağır çəkidə boks üzrə mütləq dünya çempionu müəyyənləşəcək.

Həlledici görüşdə rusiyalı məğlubedilməz dəri əlcək ustaları – WBC, WBO və IBF versiyalarında dünya çempionu Artur Beterbiyev və WBA kəmərinin sahibi Dmitri Bivol üz-üzə gələcəklər.

Böyük həyəcanla gözlənilən görüşdən əvvəl ağır çəkidə sabiq mütləq dünya çempionu Mayk Tayson favoritini açıqlayıb. Əfsanəvi boksçu A.Beterbiyevə azarkeşlik etdiyini və onun qalib gələcəyini bildirib.

Məşhur aktyor və aykido ustası Stiven Siqal da bu döyüşlə bağlı fikirlərini bölüşüb. O, favoritin kim olduğunu deməkdə çətinlik çəksə də, hər kəsi unudulmaz gecənin gözlədiyini qeyd edib.

Həvəskar səviyyədə A.Beterbiyevlə üz-üzə gələn ağır çəkidə mütləq dünya çempionu Aleksandr Usik isə D.Bivolu favorit adlandırıb. O, Dmitri Bivolun rinqdə daha yaxşı hərəkət etdiyini, müdafiədə və əks-zərbələrdə daha inamlı təsir bağışladığını vurğulayıb.

Qarşılaşma ilə bağlı açıqlama verən Yeni Zelandiyalı sabiq UFC çempionu İsrael Adesanya Dmitri Bivolun qalib olacağını düşünür. Adesanya D.Bivolun qələbəsinə 10 min dollar məbləğində mərc etdiyini deyib.

Ölkəmizin məşhur idmançıları da qarşıdakı döyüşlə bağlı fikirlərini bölüşüblər.

Kikboksinq üzrə dəfələrlə dünya və Avropa çempionu Eduard Məmmədov bildirib ki, çox maraqlı döyüş olacaq:

“Ona görə ki, rəqiblərin hər ikisi təcrübəlidir və bir-birilərini yaxşı tanıyırlar. Fiziki baxımdan mənə elə gəlir ki, Artur Beterbiyev rəqibini üstələyəcək”.