Atıcılıq üzrə dünya çempionatında Ukrayna və Qazaxıstan üçün uğurlu gün

Atıcılıq üzrə dünya çempionatında növbəti yarış günü Qazaxıstan və Ukrayna komandaları üçün uğurlu alınıb.

Kişilər arasında 10 metr məsafəyə hərəkət edən hədəfə atəş açmada ukraynalı Denis Bablyuk 1-ci, onun həmyerlisi İqor Kizima isə 2-ci nəticə göstərib. Bu növ üzrə kişilərin komanda yarışında da Ukrayna atıcıları qızıl medala yiyələniblər. Finlandiya və Koreya idmançıları isə müvafiq olaraq 2-ci, 3-cü yerləri tutublar.

Qadınlar arasında 10 metr məsafəyə hərəkət edən hədəfə atəşdə qazaxıstanlı Aleksandra Saduakassova fəxri kürsünün ən yüksək pilləsinə qalxıb. Onun həmyerlisi Zuxra İrnazarova 2-ci, ukraynalı Valentina Honçarova isə 3-cü pillədə qərarlaşıb.

Qeyd edək ki, Bakıda keçirilən atıcılıq üzrə dünya çempionatında 101 ölkədən 1239 idmançı mübarizə aparır. Yarışa sentyabrın 1-i yekun vurulacaq.