AVRO-2024 | Şotlandiya millisi İsveçrə ilə qarşılaşıb

AVRO-2024-ün A qrupunda 2-ci turun son matçı Şotlandiya və İsveçrə milliləri arasında olub.

Köln şəhərində təşkil olunan oyuna britaniyalılar yaxşı başlayıblar. 13-cü dəqiqədə Skott Maktomininin zərbəsindən sonra Fabien Şör avtoqol müəllifi olub. Buraxılan topdan sonra isveçrəlilər fəallaşıblar. Mərkəzi avropalıların hücumları 26-cı dəqiqədə nəticə verib. Jerdan Şakiri tarazlığı bərpa edib: 1-1. Tərəflər fasiləyə bu hesabla yollanıblar.

2-ci yarıda hər iki qapı qarşısında təhlükəli vəziyyətlər yaransa da, görüşdə başqa qol olmayıb. Beləliklə, görüş 1-1 hesabı ilə bitib. Bu nəticədən sonra 4 xalı olan İsveçrə qrupda 2-ci, 1 xal toplayan Şotlandiya isə 3-cü yerdədir.

Qeyd edək ki, qələbəyə həsrət olan Şotlandiya millisi sonuncu turda eyni vəziyyətdə olan Macarıstan komandası ilə qarşılaşacaq. İsveçrəni isə pley-offda iştirakını təmin etmək üçün Almaniya ilə qarşılaşma gözləyir.