Avropa çempionatında uğur qazanan güləşçilərlə görüş

Xorvatiyada keçirilən Avropa çempionatında 5-i qızıl, 6-sı gümüş və 3-ü bürünc olmaqla, ümumilikdə 14 medal qazanan güləşçilərimizin parlaq nəticələrinə həsr olunan tədbir baş tutub.

Tədbirdə çıxış edən Azərbaycan Güləş Federasiyasının prezidenti Mikayıl Cabbarov qitə turnirində qazanılan tarixi uğurlarla bağlı Prezident İlham Əliyevin təbriklərini çatdırıb.

Bildirilib ki, artıq bütün sərhədlərimiz boyunca Azərbaycan bayrağı dalğalanır və güləşçilərimiz Avropa çempionatında qazandıqları uğurları sərhədlərimizi qoruyan hərbi qulluqçularımıza, Ali Baş Komandana və Azərbaycan xalqına həsr edir.

Qeyd edilib ki, sentyabrda Serbiyada keçiriləcək dünya çempionatı “Paris-2024” Yay Olimpiya Oyunlarına lisenziya qazanmaq baxımından önəmli olduğu üçün yarışa lazımi şəkildə hazırlaşmaq məqsədilə Federasiya tərəfindən hər cür şərait yaradılacaq.

Bundan başqa, “Los-Anceles-2028” Yay Olimpiya Oyunlarına hazırlaşmaq üçün aşağı yaş qruplarına, habelə regionlarımızda da güləşin daha da inkişaf etdirilməsinə xüsusi diqqət ayrılmasının vacibliyi vurğulanıb.

Tədbirin davamında federasiyanın baş katibi Nəsimi Musayev, milli komandaların baş məşqçiləri və idmançılar qazanılan uğurlar və hədəflərdən danışaraq, güləşin inkişafı istiqamətində görüləcək işlərlə bağlı fikir mübadiləsi aparıblar.