Avropanın Top-5 çempionatlarında maraqlı oyunlar oldu

La Liqanın son çempionu “Real” 27-ci turda “Valyadolid”i qəbul edib.

“Santyaqo Bernabeu” arenasında keçirilən və madridlilərin 6-0 hesablı qələbə qazandığı matçda Kərim Benzema parlaq çıxışı ilə diqqət çəkib. İlk hissədə 29 və 36-cı dəqiqələr ərzində het-trik edən kapitan komandanın uğurunda əsas pay sahibi olub. Bundan başqa, “kral klubu”ndan Rodriqo, Asensio və Lukas Vaskesin zərbəsi dəqiq alınıb. İnamlı qələbədən sonra 59 xalla 2-ci pillədə qərarlaşan “Real” lider “Barselona”dan 12 xal geri qalır. 28 xalı olan “Valyadolid” isə 16-cıdır.

A Seriyasının lideri “Napoli” 28-ci turda doğma meydanda “Milan”la bacarmayıb. Neapoldakı görüş “rossoneri”nin 4-0 hesablı qalibiyyəti ilə başa çatıb. Qonaqlardan Rafael Leau dubl edib. Digər qollar Braim Diaz və Salemakersin aktivindədir. Bu nəticədən sonra xallarının sayını 51-ə çatdıran “Milan” 3-cü yerdədir. Son 4 matçda 2-ci dəfə uduzan “Napoli” isə 71 xalla ilk pillədəki mövqeyini qoruyur.

Son görüşlərdə qeyri-sabit oyun nümayiş etdirən “Mançester Yunayted” Nyukasl səfərindən əliboş ayrılıb. “Sent-Ceyms Park” stadionundakı qarşılaşmada Villok və Vilsonun qolları sayəsində 2-0 hesabı ilə qalib gələn “sağsağanlar” “Yunayted”lə bərabərləşiblər. 27 turdan sonra hərəyə 50 xal toplayan komandalar 3-cü, 4-cü yerləri bölüşdürürlər.

Liqa 1-də isə hesabat turu Pari Sen-Jermen üçün uğursuz olub. “Lion”u qəbul edən parislilər Barkolanın qolundan sonra 0-1 hesabı ilə uduzublar. Bununla da PSJ 2023-cü ildə keçirdiyi 18-ci görüşdə 8-ci məğlubiyyətini yaşayıb.

Qeyd edək ki, 29 turdan sonra 66 xalı olan PSJ çempionatda liderliyini davam etdirir. Komanda ən yaxın izləyiciləri “Lans” və “Marsel”i 6 xal qabaqlayır.