Azərbaycan çempionatı: “Neftçi” - “Zirə” matçı

Futbol üzrə Azərbaycan çempionatında 30-cu tura “Neftçi” ‒ “Zirə” matçı ilə yekun vurulub.

“Ağ-qaralar”ın stadionunda keçirilən qarşılaşmada hesab erkən açılıb.

9-cu dəqiqədə Filip Ozobiç meydan sahiblərini irəli çıxarıb. 23-cü dəqiqədə Edvin Kuç fərqi 2-yə yüksəldib.

Fasilə ərəfəsində Rafael Utziq 11 metrlik cərimə zərbəsindən toplardan birinin əvəzini çıxıb. İlk yarı “Neftçi”nin 2-1 hesablı üstünlüyü ilə yekunlaşıb.

2-ci hissədə isə “qartallar” gedişatı dəyişib. Əvvəlcə 61-ci dəqiqədə David Volkov tarazlığı bərpa edib: 2-2.

75-ci dəqiqədə qonaqlar 2-ci dəfə penalti qazanıblar. Utziq bu dəfə də fürsəti qaçırmayıb: 3-2. Oyunda son nöqtəni 77-ci dəqiqədə Ceyhun Nuriyev qoyub. “Neftçi” ‒ “Zirə”: 2-4.

Bu nəticədən sonra “ağ-qaralar” 35 xalla əvvəlki kimi çempionatda 6-cı pillədə qərarlaşıb. Xallarının sayını 58-ə çatdıran “Zirə” isə Premyer Liqada 2-ci yerdədir.

Qeyd edək ki, “Neftçi” növbəti görüşü “Qarabağ”a qarşı keçirəcək. “Köhlən atlar”ın meydanında baş tutacaq 31-ci turun matçı aprelin 19-da təşkil olunacaq.