Azərbaycan, Türkiyə və Pakistan komandalarının iştirakı ilə futbol yarışı olub

Bakıda Azərbaycan, Pakistan və Türkiyə dövlətlərinin dostluq və qardaşlıq əlaqələrinin möhkəmləndirilməsi, eləcə də bu xalqlar arasında birliyin gücləndirilməsi məqsədilə futbol yarışı keçirilib.

Tennis Akademiyasında təşkil olunan turnirdə ümumilikdə 4 kollektiv mübarizə aparıb. Yarışda Dəyanət Liseyi, 27 nömrəli məktəb və Bakı-İstanbul Liseyinin komandaları, eləcə də Pakistandan olan futbolçular iştirak ediblər.

Gərgin və maraqlı idman mübarizəsi şəraitində keçən yarışın finalında Dəyanət Liseyi və 27 nömrəli məktəb komandaları üz-üzə gəliblər. Oyun Dəyanət Liseyi kollektivinin 6-2 hesablı qələbəsi ilə yekunlaşıb. Yarış başa çatandan sonra qalib komandanın mükafatlandırılması baş tutub.

Daha sonra Dəyanət Liseyində sözügedən yarışa həsr olunan xüsusi tədbir təşkil olunub. Tədbirdə çıxış edənlər Azərbaycan, Pakistan və Türkiyə arasında əlaqələrin möhkəmləndirilməsindən danışıblar. Sonra tədbir məktəblilərin nümunəvi çıxışları ilə davam edib.

Əlavə edək ki, futbol turniri Azərbaycanın Pakistandakı diasporu və Bakı-İstanbul Liseyinin birgə təşkilatçılığı ilə keçirilib.