Azərbaycana qarşı təxribatla əlaqədar nazirlik və MOK-un məlumatı

Gənclər və İdman Nazirliyi və Milli Olimpiya Komitəsi Paris Yay Olimpiya Oyunlarının açılış mərasimi zamanı “France 2” telekanalının Azərbaycan və Ermənistan idmançılarının paraddan keçidi zamanı ayrı-seçkilik nümayiş etdirərək Azərbaycanı Ermənistanla toqquşmalarda ittiham etməsi ilə əlaqədar birgə məlumat yayıblar.

Məlumatda bildirilib ki, baş vermiş halla bağlı Azərbaycan Respublikasının Gənclər və İdman Nazirliyi və Milli Olimpiya Komitəsi tərəfindən Beynəlxalq Olimpiya Komitəsinə rəsmi etiraz məktubu göndərilib.

Məktubda qeyd olunub ki, dövlət telekanalının Azərbaycana qarşı bu cür hörmətsiz münasibəti Olimpiya Xartiyasının açıq-aşkar pozulmasıdır. Bu cür təbliğat oyunların ruhuna zidd olmaqla yanaşı, Azərbaycan və Ermənistan arasında sülh səylərini pozmağa xidmət edir.

Buna görə də Beynəlxalq Olimpiya Komitəsindən Paris-2024 Olimpiadası zamanı idmanın siyasiləşdirilməsinə qarşı qəti mövqe göstərilməsi, açıq bəyanat verməklə Fransa hökumətinə, Fransa Milli Olimpiya və İdman Komitəsinə, eləcə də adıçəkilən telekanala etiraz bildirilməsi xahiş edilib.