Bakıda ilk buz meydançası istifadəyə verildi

Ölkəmizdə fiqurlu konkisürmə və hokkey kimi qış idman növlərinin inkişafı istiqamətində önəmli addım atılıb. Bakıda yerləşən Heydər Əliyev adına İdman Konsert Kompleksində Gənclər və İdman Nazirliyi tərəfindən buz meydançası istifadəyə verilib.

Bununla əlaqədar sözügedən kompleksdə xüsusi tədbir təşkil olunub. Müasir standartlara cavab verən meydançanın açılış mərasiminə gənclər və idman naziri Fərid Qayıbov, Milli Olimpiya Komitəsinin vitse-prezidenti Çingiz Hüseynzadə, baş katibi Azər Əliyev, tanınmış idmançılar və federasiya nümayəndələri qatılıblar.

Tədbirdə çıxış edən gənclər və idman naziri Fərid Qayıbov buz meydançasının açılışının önəmli hadisə olduğunu deyib. O bildirib ki, burada fiqurlu konkisürmə və hokkeylə məşğul olmaq üçün hər cür şərait yaradılıb.

Nazir meydançada məşq edəcək idmançıların qarşıdakı beynəlxalq yarışlarda və olimpiadalarda ölkəmizi layiqincə təmsil edəcəyinə ümidvar olduğunu deyib.

Qeyd edək ki, buz meydançasının istifadəyə verilməsi ilə əlaqədar keçirilən tədbirin davamında idmançıların nümunəvi çıxışları baş tutub. Bundan başqa, açılışın qonağı olan uşaqlar üçün buz üzərində əyləncə proqramı təşkil olunub.