Bakıda şəhid jurnalistlərin xatirəsinə həsr olunan turnir başlayıb

18 Oktyabr – Azərbaycan Dövlət Müstəqilliyin Bərpası Günü və 8 Noyabr – Zəfər Günü münasibətilə Azərbaycanın şəhid jurnalistlərinin xatirəsinə həsr olunan 3-cü ənənəvi minifutbol turnirinə start verilib.

Bakı Tennis Akademiyasında təşkil olunan yarışda 12 komanda mübarizə aparır.

Reqlamentə əsasən, iştirakçılar əvvəlcə hər birində 3 kollektiv olmaqla 4 qrupda qüvvəsini sınayacaq. Xalların nisbəti və top fərqinə görə qruplarda 1-ci və 2-ci yerləri tutan komandalar 1/4 finala adlayacaq.

Qeyd edək ki, oktyabrın 18-dək davam edəcək yarışın ilk matçında “Report” və “Veteranlar” kollektivləri üz-üzə gəliblər. 10 qolun qeydə alındığı qarşılaşma “Veteranlar”ın 8-2 hesablı qələbəsi ilə yekunlaşıb.

Əlavə edək ki, turnirdə fərqlənən iştirakçılara müxtəlif nominasiyalar üzrə kubok və medallar təqdim olunacaq.