Bəhlul Mustafazadə "Qarabağ"la yollarını ayıra bilər

“Qarabağ”ın heyətində uğurla çıxış edən Bəhlul Mustafazadə Avropa komandalarının diqqət mərkəzinə düşüb.

26 yaşlı oyunçu Xorvatiyada çempionluq uğrunda mübarizə aparan “Hayduk Split”in transfer hədəfindədir.

İddia edilib ki, klub yaxın günlərdə “Qarabağ”la əlaqə saxlayaraq keçidlə bağlı danışıqlar aparmağa çalışacaq. Lakin Ağdam təmsilçisinin təcrübəli müdafiəçini buraxmaq niyyətində olmadığı və onun müqaviləsini uzatmaq istədiyi bildirilib.

Qeyd edək ki, “Qəbələ”nin yetirməsi olan Bəhlul Mustafazadə karyerası ərzində “Sumqayıt” və “Sabah” kollektivlərində də top qovub. 2021-ci ildən “Qarabağ”da çıxış edən və sözləşməsi yayda başa çatacaq futbolçu 89 matçda 4 qolla yadda qalıb. Bu müddət ərzində “köhlən atlar”la 2 dəfə Azərbaycan çempionu olan Bəhlul 1 dəfə isə ölkə Kubokunda qalib gəlib. 2019-cu ildən millimizə də çağırılan müdafiəçi 27 görüşdə meydana çıxıb.