Böyük Britaniya səfiri Olimpiya çempionu Zelim Kotsoyevi təbrik etdi

Böyük Britaniyanın ölkəmizdəki səfiri Ferqus Auld cüdoçumuz Zelim Kotsoyevi Olimpiya çempionu olması münasibətilə təbrik edib.

Diplomat bununla bağlı “X” sosial şəbəkəsində paylaşım edib. F.Auld postunda “Cüdoçu Zelim Kotsoyev möhtəşəm performansı ilə Azərbaycanın medal hesabına ikinci qızılı əlavə etdi. Azərbaycanlı Cüdokalar Parisdə xariqələr yaradır” sözlərini yazıb.

Qeyd edək ki, 100 kq-dək çəki dərəcəsində yarışan Zelim Kotsoyev “Paris-2024”də mübarizəyə 1/8 finaldan başlayıb. İlk görüşündə polşalı Pyotr Kuçera ilə üz-üzə gələn idmançımız ona ipponla qalib gəlib. Ardınca İsrail və Özbəkistan təmsilçiləri cüdoçumuzla bacarmayıblar. Həlledici görüşdə isə Zelim gürcüstanlı İlya Sulamanidzeni məğlub edərək çempion olub. Bununla da, ölkəmizin Paris Olimpiadasında qazandığı medalların sayı 2-yə çatıb.