“Canavarlar” yeni mövsümdə ilk qələbələrinə sevinib
İtaliya A Seriyasının iddialı komandalarından “Roma” 4-cü turda darmadağınla qalib gəlib.
“Olimpiko” arenasında “Empoli”ni qəbul edən “canavarlar” rəqibin qapısından 7 cavabsız top keçiriblər.
Paytaxt təmsilçisinin heyətində Paulo Dibala dubl edib. Digər qollar Renato Sanşeş, Brayan Kristante, Romelu Lukaku və Canluka Mançininin aktivindədir.
Daha bir epizodda isə qonaqların üzvü Alberto Qrassi avtoqol müəllifi olub. Bu nəticədən sonra yeni mövsümdə ilk qələbəsini qazanan “Roma” 4 xalla 12-ci yerdədir. 4 turdan sonra xalsız qalan “Empoli” isə sonuncudur.
“Real Madrid” La liqanın 5-ci turunda əzmkar qalibiyyətə sevinib. “Real Sosyedad”ı qəbul edən “kral klubu” 5-ci dəqiqədə geri düşsə də, dönüş edə bilib. 46-cı dəqiqədə Federiko Valverde, 1 saatın tamamında isə Xoselu fərqlənib.
2-1 hesabı ilə güclü olan “los blankos” 15 xalla yarış cədvəlinə başçılıq edir. 6 xalı olan “Real Sosyedad” isə 11-cidir.
Ötən mövsüm Premyer liqanı 2-ci pillədə tamamlayan Arsenal 5-ci turda “Everton”un qonağı olub. “Qudison Park” arenasında keçirilən matçın taleyini Leandro Trossardın yeganə qolu həll edib. 1-0 hesablı qələbədən sonra 13 xalı olan “topçular” “Tottenhem” və “Liverpul”la birlikdə 2-ci, 4-cü yerləri bölüşdürürlər. Komandalar lider “Mançester Siti”dən 2 xal geri qalır.
![icon](/images/loading.png)