Çempionlar liqasında 1/8 finalın ilk matçları yekunlaşıb

23 fevral 2023 359 baxış

UEFA Çempionlar Liqasında 1/8 finalın ilk matçlarına yekun vurulub. Yarışın favoritlərindən “Mançester Siti” Almaniyada “Leypsiq”in qonağı olub.

İlk yarı Mahrezin qolu sayəsində “şəhərlilər”in minimal üstünlüyü ilə yekunlaşıb. Məğlubiyyətdən qurtulmağa çalışan meydan sahiblərinin səyləri 70-ci dəqiqədə nəticə verib. Yoşko Qvardiol tarazlığı bərpa edib. Qalan vaxtda başqa qol olmayıb və görüş 1-1 hesabı ilə başa çatıb.

Digər qarşılaşma Milanda keçirilib. “İnter” və “Portu” klublarının matçında 1-ci hissə qolsuz yekunlaşıb. 78-ci dəqiqədə Portuqaliya təmsilçisi azlıqda qalıb. Otavio 2-ci sarı vərəqə alıb. 8 dəqiqə sonra isə “neradzurri” azarkeşlərini sevindirib. Romelu Lukaku fərqlənib. Bu qol həm də yekun nəticəni müəyyənləşdirib. “İnter” - “Portu”: 1-0.

Qeyd edək ki, həm bu komandalar, həm də “Mançester Siti” və “Leypsiq” arasında cavab görüşü martın 14-ü keçiriləcək.

#UEFA Çempionlar Liqası