Çempionlar Liqasında 1/8 finalın növbəti oyunları olub

UEFA Çempionlar liqasında 1/8 finalın daha iki oyunu keçirilib.

Yarışın favoritlərindən “Bavariya” gözlənilmədən “Latsio”ya məğlub olub.

Romanın “Olimpiko” arenasında baş tutan görüşün 67-ci dəqiqəsində Dayo Yupamekano cərimə meydançasında kobud oyuna görə birbaşa qırmızı vərəqə ilə cəzalandırılıb. Penaltini dəqiq yerinə yetirən Çiro İmmobile isə “byankoselesti”yə qələbəni gətirib. “Latsio” – “Bavariya”: 1-0.

“Park de Prens”də “Real Sosyedad”ı qəbul edən “Pari Sen-Jermen” rəqibin müqavimətini 2-ci yarıda qıra bilib. 58-ci dəqiqədə Kilian Mbappe meydan sahiblərini irəli çıxarıb. 70-ci dəqiqədə isə Bradli Barkola fərqi 2-yə yüksəldib.

Qalan vaxtda başqa qol olmayıb və 2-0 hesabı ilə güclü olan PSJ cavab matçından əvvəl üstünlük əldə edib.

Qeyd edək ki, bu, eləcə də “Latsio” və “Bavariya” cütünün cavab qarşılaşması martın 5-i keçiriləcək.