Cüdoçularımız dünya çempionatında 2-ci yeri tutdu

Cüdoçularımız dünya çempionatında uğurla çıxış ediblər.

İdmançılarımız Portuqaliyanın Odivelas şəhərində keçirilən fərdi yarışlarda 1 qızıl və 2 gümüş olmaqla 3 medal qazanıblar. Təmsilçilərimizdən 73 kq-da çıxış edən Vüsal Qələndərzadə final qarşılaşmasında Amerika Birləşmiş Ştatları idmançısı Cek Yonezuka üzərində parlaq qələbə qazanaraq fəxri kürsünün ən yüksək pilləsinə qalxıb. Daha bir cüdoçumuz, 60 kq çəkidə çıxış edən Nizami İmranov isə final görüşündə yaponiyalı Yamato Fukuda ilə qarşılaşıb və yarışın gümüş medalına yiyələnib. İkinci gümüş mükafatı isə 90 kq çəkidə qüvvəsini sınayan Vüqar Talıbov qazanıb.

Beləliklə, Azərbaycan yığması fərdi yarışlarda medal əyarına görə, ümumi hesabda və oğlanlar arasında 2-ci yeri tutub.

Qeyd edək ki, dünya çempionatının komanda yarışlarına bu gün start veriləcək. 15 ölkənin medallar uğrunda mübarizə aparacağı yarışda ölkəmiz 11 idmançı ilə təmsil olunacaq. Azərbaycan cüdoçularının ilk rəqibi Hindistan yığması olacaq.