Daha 2 klub Çempionlar Liqasının 1/4 finalında

UEFA Çempionlar liqasında 1/4 final mərhələsinin daha iki iştirakçısı müəyyənləşib.

1/8 finalın ilk matçında “Kopenhagen”i 3-1 hesabı ilə məğlub edən “Mançester Siti” cavab görüşündə də eyni hesabla qalib gəlib.

“Etihad Stedium”dakı qarşılaşmada bütün qollar ilk hissədə vurulub. “Şəhərlilər”dən Manuel Akanci, Xulian Alvares və Erlinq Holand qapını dəqiq nişan alıb.

“Kopenhagen”in təsəlli qolu isə Mohamed Elyunussinin aktivindədir. Beləliklə, iki oyunun yekununda 6-2 hesabı ilə güclü olan “Mançester Siti” növbəti mərhələyə adlayıb.

Almaniyada keçirilən qarşılaşmada “Leypsiq”ə çətinliklə qalib gələn “Real” bu dəfə rəqibini “Santyaqo Bernabeu” arenasında qəbul edib.

Matçda hesabı 65-ci dəqiqədə Vinisius açsa da, cəmi 3 dəqiqə sonra Villi Orban tarazlığı bərpa edib. Ancaq “Leypsiq”in bundan artığına gücü çatmayıb və iki oyunun yekununda 2-1 hesablı qələbə qazanan “Real” 1/4 finala yüksəlib.