Dəfələrlə dünya və Avropa çempionu olan Rafael Ağayevin 39 yaşı tamam oldu

Martın 4-ü Azərbaycan idmanının əfsanələrindən Rafael Ağayevin doğum günüdür.

1985-ci ildə Sumqayıt şəhərində anadan olan dünyaca məşhur karateçinin 39 yaşı tamam olur. Kiçik yaşlarından idmana sevgisi ilə diqqəti cəlb edən Rafael Ağayev ölkə birinciliklərində uğurla çıxış etdikdən sonra tədricən milli komandanın heyətinə cəlb olunub. Burada onun qazandığı uğurlar isə karatenin tarixində silinməz iz qoyub. 5 dəfə dünya, 11 dəfə isə Avropa çempionu adına yiyələnən Rafael Dünya oyunları, Dünya kombat oyunları, Avropa oyunları, eləcə də İslam Həmrəyliyi Oyunlarında qələbə qazanıb.

Təcrübəli idmançımız 2021-ci ildə Tokioda keçirilən Olimpiadada qızıl medala əsas namizəd kimi göstərilsə də, yalnız finalda uduzaraq gümüş mükafatla kifayətlənib. 2018-ci ildən “Karate Kombat”da da yarışan və keçirdiyi bütün görüşlərdə qalib gələn Rafael Ağayev bu təşkilatda yarımorta çəkidə çempionluq kəmərinin sahibidir.

İdmanda qazandığı uğurlarla canlı əfsanəyə çevrilən Rafael Ağayev həm də Dövlət Gömrük Komitəsinin əməkdaşıdır. Mayor rütbəsi daşıyan Rafael Baş Gömrük Mühafizə Xidmətində döyüş və fiziki hazırlığın təşkili şöbəsinin rəisidir.

Bundan başqa, o, Azərbaycan Karate Federasiyasının Ümumdünya Karate Federasiyası üzrə vitse-prezidentidir.