Dünya futbolunun ulduzları Səudiyyə Ərəbistanına yollanır

Səudiyyə Ərəbistanı komandaları dünya futbolunun ulduzlarını dəvət etməyə davam edir.

Kriştiano Ronaldonun keçidindən sonra fəallaşan klublar tezliklə Lionel Messi, Kərim Benzema və Serxio Ramos kimi oyunçuları da çempionata gətirmək niyyətindədir.

Avropa mətbuatının məlumatına əsasən, “Real”dan ayrılan Kərim Benzema “Əl-İttihad” klubu ilə 2 illik sözləşməyə qol çəkəcək. Fransalı forvard bu müddət ərzində 200 milyon avro qazanacaq.

PSJ ilə sözləşmələrini uzatmayan L.Messi və S.Ramosun da Səudiyyə Ərəbistanına üz tutacağı bildirilir. Hələ də “Barselona”dan təklif gözləyən Leo “Əl-Hilal”ın əsas hədəfidir. Bu klub L.Messiyə 2 illik müqavilə üçün 1,2 milyard avro ödəməyə hazırdır.

“Pari Sen-Jermen”dən ayrılan digər ulduz S.Ramosa da ərəb klublarından yüksək məvacib təklif olunub. 37 yaşlı veteranın tezliklə karyerası ilə bağlı yekun qərarını verəcəyi bildirilir.

Qeyd edək ki, Səudiyyə Ərəbistanı klubları bu futbolçularla yanaşı, Anxel Di Mariya, Luka Modriç, Nqolo Kante, Roberto Firmino, Jordi Alba və Serji Buskets kimi oyunçuları da çempionata gətirmək niyyətindədir.