Dünya futbolunun ulduzu Neymar məşhur klubu alır

Braziliyalı futbol ulduzu, ötən ildən “Əl-Hilal”da forma geyinən Neymar dünyaca məşhur klubun sahibi olmaq niyyətindədir.

Xarici mediada yayılan məlumata görə, 32 yaşlı forvard yetirməsi olduğu, hazırda 130 milyon avro borcu olan “Santos”a kömək etmək istəyir. O, atası ilə birlikdə Braziliya təmsilçisinin səhmlərini almağı nəzərdən keçirir.

Xatırladaq ki, daha əvvəl Neymarın 2025-ci ildə "Santos"a keçib karyerasını orada bitirəcəyi ilə bağlı xəbərlər yayılıb.

Maraq üçün deyək ki, Neymar 2003-2013-cü illərdə “Santos”un şərəfini qoruyub. Bu müddət ərzində 140 matçda meydana çıxan braziliyalı 72 qolla yadda qalıb. Eyni zamanda komanda ilə ölkə çempionu olan forvard kubokda da qalib gəlib.

Qeyd edək ki, Braziliyanın ən köklü klublarından olan “Santos” 1912-ci il aprelin 14-də yaradılıb. Bu illər ərzində 8 dəfə ölkə çempionu, 3 dəfə isə Libertadores Kubokunun qalibi olan “ağ-qaralar” tarixlərində ilk dəfə ötən il doğma meydanlarında məğlub olaraq aşağı liqaya düşüblər.