Emin Mahmudov “Neftçi” klubundan ayrılır?

“Neftçi”nin ulduz futbolçusu Emin Mahmudov klubdan ayrılmağa yaxındır. 32 yaşlı yarımmüdafiəçi qışda Bakı təmsilçisini tərk etmək istəyir.

Yerli mediada yayılan xəbərə əsasən, Türkiyə Super liqasının 2, Rusiya Premyer liqasının isə 1 kollektivi Eminlə yaxından maraqlanır. Komandaların adları açıqlanmasa da, təcrübəli oyunçunun bu klublardan birinə keçəcəyi bildirilir.

Qeyd edək ki, Emin Mahmudov 2017-ci ildən “Neftçi”nin formasını geyinir. 235 matçda meydana çıxan yarımmüdafiəçi 56 qol və 58 məhsuldar ötürmə müəllifi olmaqla yanaşı, “ağ-qaralar”la ölkə çempionatında qalib gəlib. “Transfermarkt” portalına əsasən dəyəri 900 min avro olan Eminin paytaxt təmsilçisi ilə müqaviləsi 2025-ci ilə qədərdir. 2016-cı ildən Azərbaycan millisinə də dəvət olunan E.Mahmudov 51 görüşdə 14 dəfə rəqib qapılarına yol tapıb.