“Fənərbağça” Konfrans liqasında növbəti mərhələyə yüksəlib

Türkiyənin “Fənərbağça” klubu UEFA Konfrans liqasında növbəti mərhələyə yüksəlib.

İstanbul təmsilçisi II təsnifat mərhələsinin cavab matçında səfərdə Moldovanın “Zimbru” komandası ilə üz-üzə gəlib. Kişineuda keçirilən oyun “sarı-lacıvərdlilər”in 4-0 hesablı qələbəsi ilə yekunlaşıb.

“Zimbru” stadionunda baş tutan görüşdə hesabı 48-ci dəqiqədə Duşan Tadiç açıb. 57-ci dəqiqədə Mişi Batşuayi fərqlənib. Az sonra Mişi dubl edib. 3-0.

Bundan sonra da hücumlarına ara verməyən Türkiyə nəhəngi 77-ci dəqiqədə 4-cü topu meydan sahiblərinin qapısından keçirib. İsmail Yüksek qarşılaşmada son nöqtəni qoyub.

Bu klublar arasında ilk matç “Fənər”in 5-0 hesablı qalibiyyəti ilə yekunlaşdığı üçün İstanbul komandası iki oyunun yekununda 9-0 hesabı ilə güclü olub.

Qeyd edək ki, “Fənərbağça” Konfrans liqasının III təsnifat mərhələsində Sloveniyanın “Maribor” və Lüksemburqun “Differdanj” komandaları arasında cütün qalibi ilə üz-üzə gələcək.