FIFA 2023-cü ilin rəmzi komandasını açıqlayıb

2023-cü ilin yekunlarına həsr olunan qala mərasimində FIFA ilin ən yaxşı futbolçularının yer aldığı rəmzi 11-liyi təqdim edib.

Kollektivdə ötən il Çempionlar liqası, İngiltərə çempionatı və kuboku, eləcə də UEFA superkubokunu qazanan “Mançester Siti”nin 6 oyunçusuna yer verilib. 3-3-4 taktiki sxeminə əsasən hazırlanan komandanın qapısını “Real Madrid”in qolkiperi Tibo Kurtua qoruyur.

Müdafiə xəttində mankunianların 3 futbolçusu – Kayl Uoker, Ruben Diaş və Con Stounz mövqe tutub. Yarımmüdafiədə “Siti”nin daha 2 üzvü – Bernardu Silva və Kevin de Brüyne ilə yanaşı, “Real Madrid”dən Cud Bellingem qərarlaşıb.

Hücum xəttində isə 4 futbolçu yer alıb. Burada FIFA tərəfindən ötən ilin ən yaxşı futbolçusu seçilən Lionel Messi ilə yanaşı, PSJ-nin ulduzu Kilian Mbappe, “Real”ın üzvü Vinisius Junior və “Mançester Siti”nin əsas qol silahı Erlinq Holand mövqe tutub.