Formula 1-də Montsa Qran-Prisinə yekun vurulub
Formula 1 üzrə dünya çempionatında mövsümün 16-cı yarışının qalibi müəyyənləşib.
Montsa avtodromunda təşkil olunan Qran-priyə 1-ci sırada “Maklaren-Mersedes” üzvü Lando Norris başlayıb. Lakin britaniyalı pilot üstünlüyünü qoruya bilməyib.
Mərhələ ərzində daha uğurlu strategiya seçən “Ferrari” üzvü Şarl Lekler finişə 1-ci çatıb. Bununla da monakolu sürücü mövsümdə 2-ci qələbəsini qazanıb.
Leklerin ardınca “Maklaren-Mersedes” pilotları Oskar Piastri və Norris müvafiq olaraq 2-ci, 3-cü yerləri tutublar. 3 qat dünya çempionu Maks Ferstappen isə 6-cı pillədə qərarlaşıb.
Bu nəticələrdən sonra xallarının sayını 217-ə çatdıran Lekler ümumi sıralamada 3-cüdür. Şarl “Red Bull” pilotu, lider Ferstappendən 86, 2-ci yerdəki Norrisdən isə 24 xal geri qalır.
Mühəndislər kuboku uğrunda da əsas mübarizə “Red Bull” və “Maklaren-Mersedes” arasında gedir. 446 xal toplayan Avstriya komandası 2-ci pillədəki Böyük Britaniya kollektivini 8 xal qabaqlayır.
Qeyd edək ki, Formula 1 üzrə dünya çempionatının növbəti mərhələsi ölkəmizdə təşkil olunacaq. Bakı Şəhər Halqasında keçiriləcək yarışın qalibi sentyabrın 15-də müəyyənləşəcək.
![icon](/images/loading.png)