Hakimin döyülməsindən sonra Türkiyədə futbol matçları təxirə salındı

Türkiyə çempionatında “Ankaragücü” – “Çaykur Rizəspor” matçı qalmaqalla bitib.

Görüş yekunlaşandan sonra Ankara təmsilçisinin prezidenti Faruk Koca baş hakim Halil Umut Meleri yumruqla vurub. Kocanın yanında olan şəxslər isə yerə yıxılan Meleri təpikləyiblər. Hadisə nəticəsində referinin gözünün altında şişkinlik yaranıb və o, dərhal xəstəxanaya yerləşdirilib.

Bu insidentdən sonra Türkiyə Futbol Federasiyasının qərarı ilə ölkənin bütün liqalarında qarşılaşmalar təxirə salınıb. Hadisə ilə bağlı danışan qurumun prezidenti Mehmet Büyükekşi bu hücumun tək baş hakimə yox, Türkiyə futbolunun bütün nümayəndələrinə edildiyini və günahkarların cəzalandırılacağını bildirib.

Sözügedən insidenti Türkiyə Prezidenti Rəcəb Tayyib Ərdoğan da pisləyib. “İdman sülh və qardaşlıq deməkdir. Zorakılıqla bir araya sığmır. Türkiyə idmanında şiddətə dözməyəcəyik”, – deyə dövlət başçısının bəyanatında vurğulanıb.

Qeyd edək ki, qalmaqalın baş verdiyi “Ankaragücü” – “Çaykur Rizəspor” qarşılaşması 1-1 hesabı ilə yekunlaşıb. Qonaqlar yalnız əsas vaxta artırılan dəqiqələrdə fərqlənərək məğlubiyyətdən xilas olublar.