İdmançımız Aslan Əmiraslanov 1 gündə 3 qızıl medal qazanıb

Azərbaycanlı ağırlıqqaldıran Aslan Əmiraslanov 15 və 17 yaşlı yeniyetmələr arasında keçirilən Avropa birinciliyində parlaq nəticəyə imza atıb.

Yaşı 15-ə qədər olan atletlər arasında 89 kiloqram çəki dərəcəsində qüvvəsini sınayan idmançımız birdən qaldırmada 114 kiloqramı ram edərək 1-ci yeri tutub. Təkanla qaldırmada 140 kiloqramı başı üzərinə qaldıran Aslan bu növdə də qızıl medal qazanıb.

İki hərəkətin cəmində ümumən 254 kiloqramlıq göstərici ilə yadda qalan A.Əmiraslanov yekun sıralamada da hər kəsi qabaqlayaraq daha bir qızıl mükafata layiq görülüb. Beləliklə, təmsilçimiz yarışı 3 qızıl medalla başa vurub.

Qeyd edək ki, Yunanıstanın Saloniki şəhərində keçirilən və 38 ölkədən atletlərin qatıldığı yarışda 198-i qız və 217-si oğlan olmaqla 415 idmançı mübarizə aparır. Turnirə iyunun 23-ü yekun vurulacaq.