İdmançının medalı elə halda imiş ki... | Hyustondan qalmaqallı paylaşım

2024-cü ildə Parisdə keçirilən Olimpiya Oyunlarında bürünc medal qazanan ABŞ milli komandasının skeytbordçusu Nijah Hyuston yarışdan cəmi bir həftə sonra mükafatının başına gələnləri göstərib.

29 yaşlı N.Hyuston “Instagram”da medalının vəziyyətini paylaşaraq, onun yeni olanda çox daha gözəl göründüyünü qeyd edib. “Bu Olimpiya medalları yenicə alınanda heyrətamiz görünür. Ancaq mən bir az tərləmiş bədənimdə gəzdirdikdən sonra onu həftəsonu dostlarıma verdim”, – deyə idmançı medalın hazırkı vəziyyətini göstərib.

N.Hyustonun yaydığı videodan görünür ki, medalın bürünclə örtülməsi bir neçə yerdə çatlayıb və solğunlaşıb. “Görünür, onların keyfiyyəti gözlənilən qədər yüksək deyil”, – idmançı deyib.

N.Hyuston sosial media hesabında əlavə edib: “Məncə, Olimpiya medallarının keyfiyyəti bir az yaxşılaşmalıdır”. Ola bilər, bu hal yalnız bürünc medallara aiddir.

Əgər qızıl və gümüş medalların da başına eyni aqibət gəlsə, bu, o demək olacaq ki, təşkilatçılar medalları hazırlayarkən qiymətli metallara ciddi şəkildə qənaət ediblər.