İngiltərə Premyer Liqasında bol qollu gecə

İngiltərə Premyer liqasında 22-ci turun maraqlı oyunlarından biri “Aston Villa” və “Nyukasl” arasında olub.

“Villa Park” stadionunda keçirilən görüşün ilk hissəsində qonaqlar 2 dəfə fərqləniblər. Hər iki epizodda “sağsağanlar”ın müdafiəçisi Fabien Şer hədəfi dəqiq nişan alıb.

52-ci dəqiqədə Aleks Morenonun avtoqolundan sonra “Aston Villa” 3-cü dəfə matça mərkəzdən başlamalı olub. Birmingemlilər bu toplardan ancaq birinin əvəzini çıxıblar.

71-ci dəqiqədə Ole Votkinsin qolu həm də yekun nəticəni müəyyənləşdirib. 3-1 hesabı ilə güclü olan “Nyukasl” çempionatda 4 oyunluq qələbəsiz seriyasını sonlandırıb. Hazırda bu komanda 7-ci, “Aston Villa” isə 4-cü yerdədir.

“Kristal Pelas” – “Şeffild Yunayted” qarşılaşmasında isə azarkeşlər 5 qol görüblər. Fasiləyədək Ben Brereton Diaz və Ceyms Makatinin toplarına “Pelas” Ebereçi Ezenin dublu ilə cavab verib. 67-ci dəqiqədə isə Maykl Olise London təmsilçisinə qələbəni gətirən qolu vurub. “Kristal Pelas” – “Şeffild Yunayted”: 3-2.