İspaniya Superkubokunun qalibi məlum oldu

16 yanvar 2023 330 baxış

İspaniya Superkubokunda qalibin adına aydınlıq gəlib.

Həlledici matçda əzəli rəqiblər “Real Madrid” və “Barselona” üz-üzə gəlib. Səudiyyə Ərəbistanının Ər-Riyad şəhərində baş tutan görüşdə 4 qol qeydə alınıb. İlk dəqiqələrdən təşəbbüsə yiyələnən “kataloniyalılar” 33-cü dəqiqədə hesabı açıblar. Qavinin zərbəsi dəqiq olub.

Fasilə ərəfəsində fərq 2-yə yüksəlib. Robert Levandovski komandasının üstünlüyünü 2 topa çatdırıb. Bundan sonra da hücumlarını davam etdirən “blauqrana” 69-cu dəqiqədə 3-cü qolu vurub. Bu dəfə Pedri qapını dəqiq nişan alıb. “Real”ın gücü yalnız təsəlli topuna çatıb.

Əsas vaxta artırılan 3-cü dəqiqədə Kərim Benzema görüşdə son nöqtəni qoyub. “Real Madrid”-“Barselona”: 1-3. Bu nəticədən sonra “Barsa” tarixində 14-cü dəfə superkubokun sahibi olub. 5 illik fasilədən sonra mükafata yiyələnən kataloniyalılar yarışda qələbələr baxımından bütün rəqiblərini qabaqlayır.

#İspaniya superkuboku