İspaniya və Niderlandda çempionlar müəyyənləşdi

La liqada yeni çempionun adına aydınlıq gəlib.

34-cü turun oyununda əzəli rəqibi “Espanyol”un qonağı olan “Barselona” artıq fasiləyədək 3 qol vurub. 2-ci yarıda da hücumlarını davam etdirən “Barsa” 53-cü dəqiqədə Kundenin dəqiq zərbəsi ilə hesabı 4-0 edib. Qalan vaxtda “Espanyol” 2 topun əvəzini çıxsa da, meydan sahiblərinin bundan artığına gücü çatmayıb.

Bununla da, görüşdə 4-2 hesabı ilə qalib gələrək xallarının sayını 85-ə çatdıran və 2-ci yerdə olan “Real”ı 14 xal qabaqlayan “Barselona” sona 4 tur qalmış çempionluğunu rəsmiləşdirib. La liqada 27-ci dəfə qızıl medalları qazanan komanda həm də ümumən tarixində 99-cu mükafata yiyələnib.

Niderland çempionatında da titulun sahibi məlum olub. Yarış cədvəlinin lideri “Feyenoord” 32-ci turda “Qou Ehed İqls” kollektivini qəbul edib. Rotterdamlıların üstünlüyü ilə yadda qalan qarşılaşma 3-0 hesabı ilə yekunlaşıb. İdrissi, Ximenes və Payşanın qolları “Feyenoord”a oyunda qələbə qazandırmaqla yanaşı, həm də kluba tarixində 16-cı çempionluğu gətirib.