Kərəm Aktürkoğlu karyerasını “Mançester Yunayted”də davam etdirə bilər

Türk futbolunun əsas ulduzlarından, hazırda “Benfika”da forma geyinən Kərəm Aktürkoğlu karyerasını İngiltərədə davam etdirə bilər.

Bu barədə Türkiyə mətbuatında xəbərlər paylaşılıb.

Bildirilib ki, 25 yaşlı vinger “Mançester Yunayted” kollektivinin diqqət mərkəzindədir. İddialara görə, “qırmızı şeytanlar” Kərəm üçün Portuqaliya təmsilçisinə 40 milyon avro təklif etməyə hazırlaşır. Lakin “Benfika” Kərəmi klubdan göndərmək niyyətində deyil.

Qeyd edək ki, “Transfermarkt” portalına görə, dəyəri 15 milyon avro olan K.Aktürkoğlu ötən ay “Qalatasaray”dan “Benfika”ya transfer olunub. Bu müddətdə 5 matça çıxan Kərəm 4 qol vurub və 2 məhsuldar ötürmə müəllifi olub.

Təcrübəli futbolçunun əsas uğurları isə “Qalatasaray”la bağlıdır. 2020-ci ildən “sarı-qırmızılar”ın heyətində top qovan Kərəm 179 matçda 46 qol və 42 məhsuldar ötürmə ilə yadda qalıb. “Cim-bom”la 2 dəfə Türkiyə çempionu olan futbolçu 1 dəfə ölkə Super Kubokunda qələbə qazanıb.