Maks Ferstappen Formula 1-də tarixi uğura nail olub
Formula 1 üzrə dünya çempionatında mövsümün 14-cü yarışında qalib müəyyənləşib. Pilotlar bu dəfə İtaliyanın məşhur “Montsa” avtodromunda mübarizə aparıblar.
51 dövrə davam edən Qran-prinin yekununda son 2 ilin dünya çempionu Maks Ferstappen qələbə qazanıb. Ardıcıl 10-cu yarışda qalib gələn niderlandlı pilot bu uğura imza atan ilk sürücü kimi tarixə düşüb.
Montsadakı mərhələdə 2-ci yeri “Red Bull”un digər üzvü Serxio Peres tutub. “Ferrari” komandasından Karlos Sayns isə ilk 3-lüyü qapayıb. Bu nəticədən sonra Ferstappen əvvəlki kimi ümumi sıralamanın zirvəsindədir.
364 xalı olan Maks ən yaxın izləyicisi Peresi 145 xal qabaqlayır. 3-cü pillədə isə “Aston Martin” kollektivindən Fernando Alonso qərarlaşıb. İspaniyalı pilotun aktivində 170 xal var.
Qeyd edək ki, mühəndislər kuboku uğrunda mübarizədə də “Red Bull” 1-cidir. 583 xalı olan Avstriya komandası 2-ci pillədəki “Mersedes”dən 310 xal öndədir.
![icon](/images/loading.png)